2025eko Aste Santua

Kaixo, Aratz!!

Zer moduz zaudete? Gu irteerara itzuli nahian, opor gehiago nahi ditugu! Berriz ere martxan gabiltza eta asteburu honetan zubiagatik elkartuko ez garen arren, datorren astean bueltan gatoz. Gaurkoan irteerako recap-a dakargu, betiko lez. Muzkin egon ginen apirilaren 24tik 27ra, seguruenik Lizarraldean dagoen herri txiki eta bakartienean. Iristeko errepidea oso polita, bai, baina zelakoa… autobusean mareoren bat egon zen, baina ezer larririk ez.

Autobusetik jeitsi bezain laister izenak errepasatzea da gure tradizioa. Nahiko fin ibili zineten denak, nabaritu zen irteerara gogoz etorri zinetela. Ondoren, zapitxoaren jolasa egin genuen eta, amaitzeko, muxu stop: elkarri muxu-muxu eman salbatzeko. <3

Bazkaltzeko norberak bere bokata eta arratsaldean adarka bildu ginen. Koxkorren gaia mitologia izan da irteeran zehar, eta lehenengo ekintzarako dado magiko batekin aritu ziren jolasean froga ezberdinak burutuz. Oinarinek bere marrazteko gaitasuna demostratu zuten taldeka leihatu eta elkar harrapatzen saiatuz. Azkarrek, aldiz, bere ekintza propioa prestatu zuten trebe eta begiraleentzat: Jumanji pelikulan oinarritutako scape room bat etxe guztian zehar. 

Hurrengo goizean, Muzkitik gertu dagoen Allotz lakura joan ginen adar guztiak. Bero itzela egiten zuen eta gutako asko bainatu ginen. Trebeak vlogerrak dira antza denez, eta bere kamararekin irteerako momentu berezienak grabatu zituzten, baita lakuko barre eta jolasak ere. Bideo bat omen daukate prest… ze gogo ikusteko!!

Arratsalderako, koxkorrak eskulanetan aritu ziren koloretazko llaberoak egiten. Gainera, hiltzailera jolastu ziren karta mitologikoekin. Oinarinak, otso eta artaldeen jolasean murgildu ziren. Joku psikologiko-manipulatibo-gaslighting estilokoa. Paper on bat egin eta ondokoari ziria sartzea, alegia. Ulertzeko piska bat konplikatua, baina oso ondo pasa zuten. Azkarrek, gai ezberdinen inguruan bere iritzi eta bizipenak partekatu zituzten. Elkarri irekitzea pixka bat zaila egin daiteke tarteka, baina ze polita den. Trebeei dagokienez, esan dizuegu influencer profesionalak direla. Eta lanbide horretan ez da guztia dibineoa, get ready with me eta outfit check egitea. Edizio lana ere badago eta batzuetan ez da espero bezain erreza.

Talde egunerako ipuinen herrialdera egin genuen bidaia. Adar ezberdinak nahastu eta lau talde egin genituen egun osorako: txanogorritxu, 3 txerritxoak, errauskine eta edurnezuri. Goizerako, denek batera froga ezberdinak pasa behar izan genituen, denak denen aurka. Etxea eraiki, dantzarako prestatu, amonaren etxerako bidea egin eta sagarra-mantzana jatea lortzea. Arratsaldean, herrian iskanbila handia sortu zuen albistea iritsi zitzaigun: ipuin kontalaria hilda agertu zen, baina zalantza asko genituen denok: nork hil du? nola? non? Detektibe lanetan aritu ginen ipuinetako pertsonai ezberdinei zekiten informazioa galdetuz. Gaubelan, talde bakoitzak bere bertsioa kontatu zigun eta, azkenik, benetan gertatutakoa deskubritu genuen begiraleen antzerkian: printzea izan zen. Sagar pozointsuak identifikatzen ikasi behar duela dirudi. Hori eta mikromatxismo tailerra. 

Ba hori izan da irteera, maitiak. Hirugarren hiruhilekoa nahiko motza izango da, baina horrek esan nahi du kanpa berehala daukagula hemen! 

Aio aioooo

Inauteriak Txuri-Urdinen!

Kaixo, Aratz!

Kaldereroak iragarle, joan den asteburuan inauteriak ospatu genituen aratztarrok. Donostiako Txuri-Urdin izotz jauregian elkartu ginen, adar bakoitzak prestatutako mozorroa erakusteko irrikitan.

Koxkorrek, gai librean, denetariko mozorroak ekarri zituzten: soineko panpoxenetik animalia basatienera. Oinarinek, nahiko basatiak dira hauek ere, beren zooa aurkeztu ziguten (herensuge eta guzti). Azkarrak, raperoz: urrezko kate pisutsu, galtza erori eta leopardoarekin. Oso gangsta. Trebeak, aldiz, hippie belarjaleak izan ziren. Uztaila aldera autogestioa eta auzolana oinarri dituen komunara etortzera gonbidatu gintuzten. Ziur beraien kantu bitxiak ikasiko ditugula, eta (agian) beren tofua probatuko. Azkenik, SuperAratzeko superheroiek ere bisita egin ziguten: superkusionista, superretxiko, superregina...

Nork zuen mozorro onena?

Patinak jantzi eta barrura. Baten bat gehiegi emozionatu eta sartu bezain laster ipurdiz erori zen. Baina piskanaka oreka topatzen joan ginen eta bueltaka pasatu genuen arratsaldea. Elkarri eskua emanda, harrapaketan, noizbehinka deskantso... oso pozik!

Bigarren hiruhilekoaren erdian gaude dagoeneko, beraz asteburu honetan berriz ere adarka banatuko gara. Baina, adi, Aste Santua eta irteera hortxe bertan daude eta.

Laister arte :)

2024ko Gabonak

Urte berri on, Aratz!!

Urte zaharra joana zaigu eta urte berria hasi. Zer eskatuko diozue 2025ari? Guk 2024ean bezain ongi pasatzen jarraitzea, gutxienez. Pixka bat gehiago bada hobe. Koxkorrak hortan adituak dira, haiei galdetu beharko diegu… Gabonak aspaldi utzi genituen atzean eta errutinara itzuli gara denok dagoeneko: ikastola, lana eta azterketak barra-barra. Baina tira, irribarretxo bat aterako dizuegulakoan, gaurkoan gabonetako irteerako laburpena dakarkizuegu.

Lasturren egon ginen abenduaren 26tik 29ra. Debako udalerriaren parte den bailara txiki-txiki bat da, ia zulo itxura duena. Eguzki izpi bat ere ez da sartzen neguan. Baina eguraldi polita eduki genuen, eta inguruko mendiek bista paregabeak eskeini zizkiguten. 

Autobusetik jeitsi bezain laister hasi ginen jolasten. Izenak errepasatu eta aratztar berriren bat ere ezagutu genuen. Gero, betiko jolas klasikoak, baina aldaketaren batekin (semaforoak geroz eta kolore gehiago ditu!). Bazkaltzeko, bakoitzak etxetik ekarritakoa: batzuek bokata, besteek makarroi tupperra. Denetarik. Arratsaldean adarka bildu ginen ekintza ezberdinak egiteko. 

Koxkorrek pista joku leihakor baten ondoren meriendarako sandwich xelebre batzuk prestatu zituzten. Oinarinek banderatxo jolasa moldatu eta korrika atzera eta aurrera pasa zuten arratsaldea. Azkarrak Lasturreko frontoiean aritu ziren eskalatzen, spikeball jolasten… Trebeak, azkenik, beraiek sortutako Cluedo pertsonalizatu batetara jolasten aritu ziren. 

Gau horretan Argitxok berriz ere bisita bat egin zigun. Euskeraren mendia igo behar zuela azaldu zigun, gailurrean zegoen bere kriseilua berreskuratu nahi zuelako. Igotzeko modu bakarra zegoen: guk euskeraz hitz egitea. Irteeran zehar bakoitzak txaloen bitartez ebaluatu zuen bere burua Argitxori emandako bultzadaren arabera. Irteera amaieran, Argitxo triste geratu zen ezin izan zuelako bere kriseilua berreskuratu. Oraindik nahiko lan dugu aurretik. Ea hurrengoan!

Hurrengo goiza behe lainoz inguraturik hasi genuen. Honek ez zizkien baina koxkor eta trebeei inguruko mendietan ibilalditxo bat egiteko indarrak kendu. Oinarin eta azkarrak, aldiz, Lasturren gelditu ziren. Oinarinek nerabezaroko kezka eta gogoeta ezberdinen inguruan jardun zuten, tartean Epilepsia duen lagun bati nola lagundu ikasiz. Azkarrek plastilinarekin pertsonai eta objektu ezberdinak sortu zituzten. Zuek bai artistak! 

Arratsalderako Koxkorrak eskulanak egiten aritu ziren. Gatza klarionaz margotu eta koloretazko olatuak sortu zituzten beirazko ontzietan. Azkarrek adarkide eta begiraleak kategoria ezberdinetan sailkatu zituzten. Batzuk arruntagoak (ze fruta naizela uste duzu?) eta beste batzuk sakonagoak (zeintzuk dira nire indargune eta ahuleziak?). Dinamika polita taldea indartzeko. Trebeek primerako cookieak prestatu zituzten, baita eskulantxoak ere. Erakutsi ziguten beren abilezia.

Hiruhileko honetan oinarinen abentura Oscar bat irabazteko moduko antzerki bat prestatzea izan da, eta azken ukituak prestatzen ibili ziren arratsaldean zehar. Gaubelan aktore lanetan aritu ziren eta beren talentua erakutsi ziguten guztioi. Mari Domingi, izeba pija, Pedrotxe… astoa ere ez zen falta. Ezta barreak ere. Bestalde, azkarrek Wannabe doinua hartuz abesti eta koreografia berezi bat prestatu zuten. Kameraman bat ere kontratatu zuten beren bideoklipa grabatzeko. Aupa azkarrak!

Talde egunerako, Just Dance, Minecraft, Wii Sports eta Pokemon taldeek bideo jokoen mundua bisitatu zuten. Goizean zehar gaitasun ezberdinak trebatu zituzten: punteria, adimena, sormena, energia… eta arratsaldean elkarren artean leihatu ziren gaitasun bakoitza praktikan jarriz. Helburua argia zen: trebeen dorreak garaitzea. Hotza egin arren, korrika hasita segituan berotu ginen denok. Olagarro eta Einstein kartak izan ziren protagonistak. Hori bai, buruhausteak ekarri zizkieten batzuei. 

Gaubelarako, froga ezberdinak pasatuz Lasturreko aterpetxera sartzen saiatu ginen. Zezenak, kamerak, X izpiak… baten bat mailaren batean blokeatu zen, baina azkenean denok iritsi ginen “desagertutako” postre goxoa zegoen gelara. Inuxente! Horren ondoren, talde bakoitzak antzerki bana zeukan prestatua. Hauekin ere barreak ez ziren gutxi izan. 

Beti bezela, espero baino azkarrago pasa zitzaigun denoi irteera. Motxila egin, etxea jaso eta berriz ere autobusera.

Muxu bana, Aratz!